النص المسرحي( سلك شائك ) تأليف / سامح عثمان
سلك شائك
سامح عثمان
الشخصيات
ــــــــــــــــ
رجل 1 + رجل 2 يرتدى كلا منهما
حلة كاملة
يحركان الاحداث هما محور ارتكاز الصراع
مقاتل1 +مقاتل 2 يرتدى كلا
منهما حسب رؤية المخرج
هما قطبى
الصراع الخاضعان لتحكمات الرجلين
دراما حركية
ــــــــــــــــــ
الدراما تعبر عن الصراع بين الرجلين .. يتحدي كلا منهما الاخر..يوجد كل منهما مقاتله كبديل جسدي عنه
يزرعا السلك الشائك .
يبرمجان ادمغة المقاتلين .
.....................................
الديكور
ـــــــــــ
ديكور بسيط من الاسلاك الشائكة
ومستوى اعلى ف منتصف المسرح خلفه بانوراما بيضاء وامامها منضدة لمفاوضات الرجلين
ولهما كرسيان للجلوس
.....................................................
مقاتل1: وجدت على هذه القطعة من الارض بلا ذاكرة سابقة
مقاتل2: لا اعرف من اين جئت .. ولا الى اين سأذهب ؟!
مقاتل1: لكنى اعرف مهمتى جيدا ..
مقاتل2: واحفظ عن ظهر قلب ما ينبغى على ان افعل
رجل1: (لمقاتل1) عليك ان تعرف عدوك
رجل2: (لمقاتل2) انه خلف هذا السلك الشائك
الرجلان: ها هو ... (يشيران للمقاتلين)
رجل1: انه يكرهك
رجل2: يتمنى الفتك بك
رجل1: يريد ان يتعدى هذا السلك
رجل2: ليجردك مما تملك
رجل1: من شرفك
رجل2: من حياتك
رجل1: هذا هو سلاحك (يعطيانهما سلاحان)
رجل2: وهذا هو علمك (يضعان العلمين )
رجل1: وهذا هو ألهك الذى تصلى من اجله (يعطيه طوطم)
مقاتل1: العصفور المحلق ؟ّ!
رجل2: (يعطى مقاتل طوطم).. العصفور الواقف فوق الغصن
رجل1: انتما مختلفان كل الاختلاف
رجل2: لايوجد امل للحوار بينكما الا بالسلاح
مقاتل2: القتل ؟ّ!
رجل1: ولكن فى الوقت المناسب .. وحين يصدر الامر
رجل2: هل عرفت الان لماذا انت هنا
مقاتل1: (بآلية) تفعيلا لمبدأ الانتماء ونشر العقيدة الصادقة
مقاتل2: (بآلية) ودفاعا عن الحق ولحماية الشرف
(يتبادل الرجلان المواقع فجاة قفزا من فوق السك الشائك بحيث يصبح كلا منهما
امام مقاتل الاخر)
الرجلان: (يصفعان المقاتلين ) .... (يبصقان عليهما)
الرجلان: (بأزدراء ممزوج بالتسيد) بل من اجل تنفيذ الاوامر
(يذهب الرجلين الى المستوى الاعلى )
(بؤرتى اضاءة على المقاتلين وكل منهما امام علمه يؤدى التحية )
(موسيقي )
* نقلة اضاءة*
(الرجلان على المستوى الاعلى جالسان امام مائدة وبجوار كل منهما حقيبة
سمسونايت )
رجل1: بيتهيألى انى لقيت الحل اللى ح يريحنى ويريحك ويجنبنا ويلات كتير
رجل2:المهم انه يكون مرضى لجميع الاطراف
رجل1:انا شايف ان هو الخيار الوحيد
رجل2:المهم انه يكون خيار مريح
رجل1:(يضع الحقيبة على المائدة) ده بيتوقف على المرونة اللى انت ح تبديها
رجل2:ماعنديش مانع ف اى مرونة بدون تفريط
رجل1:أدى الحل المقترح بكامل بنوده (يخرج رق من الحقيبة ويغنى ) الليل
الليل اللى يا ميمون وانا اقول الليل واكون ممنون (يكرر ورجل1 يرقص كالقرد)
رجل2: لا ده تهريج
رجل1: افهم من كده انك بترفض الحل بتاعى
رجل2:هو ده حل ؟! ده هزار وشغل تلات ورقات .. انا عندى الحل
رجل1: المهم انه يكون حل عادل
رجل2:(يضع الحقيبة على المائدة) عادل وشامل وعملى وفعال (يخرج اوراق ويضعها
على المنضدة بمنتهى الجدية )
حل استغرق وقت مضنى وبحث قاتل وجهد متفانى (يخرج شخاليل من الحقيبة ويغنى
بلحن اخر ) الليل الليل اللى يا ميمون وانا اقول اللى واكون ممنون (رجل1 كالقرد
بشكل اخر ) (رجل2 يكرر)
رجل1: ده مش كلام ابدا .. ده خروج على مبدا الشرعية
رجل2: يبقى متفقناش (يهبد بيده المنضدة )
رجل1: (يهبد المنضدة) مختلفين تماما
* نقلة اضاءة*
(المقاتلان كلا منهما فى حدود قطعة ارضه متوجسا خيفة من الاخر يفصل بينهما
السلك الشائك ولكنهما فى حالة ترصد لبعضهما البعض مع كل حركة والتفاتة يبرر كل
تصرفات الاخر العادية على انها ضده او تصرفا قد يؤدى به لذلك فهما فى حالة تحفز )
مقاتل1:(يهم باخراج شيئا من جيبه الخلفى)
مقاتل2: (فى تحفز ويفعل المثل )
مقاتل1: (يخرج من جيبه مشط )
مقاتل2: (يخرج من جيبه ملعقة )
(ينشغل هذا بتصفيف شعره بينما ينشغل الاخر بأكل الزبادى .. مع استمرار حالة
التحفز والنظر المتبادل)
مقاتل2: (يتظاهر كما لو كانت ذبابة تضايقه اثناء الاكل فيتذمر ويطاردها حتى
تترك ارضه وتذهب للاخر)
مقاتل1: (يتظاهر بنفس الشئ اثناء تصفيف شعره ويطاردها ايضا )
مقاتل2: (يطاردها بمضرب ذباب ) هش .. هش
مقاتل1: (يفعل نفس الشئ )
( كل منهما يطرد الذبابة الى ارض الاخر حتى يتحول الامر الى مبارة تنس
شبكتها السلك الشائك .. صوت ميع داخلى يتابع المباراة حتى تصل المنتجة 30:30 )
مقاتل1: (يبحث عن الذبابة بانفعال ) هى فين ؟ .. فين ؟
الدبانة دى جاية من عندك اصلا ...
مقاتل2:الهوا مفتوح .. ايش عرفك انها جاية من عندى انا .. ما يمكن من عندك
انت
مقاتل1:لآ .. من عندك انت
مقاتل2: اشمعنى ؟ّ
مقاتل1: عشان انت معفن .. والحاجة المعفنة بتلم الدبان
مقاتل2: اذا كنت انا معفن .. فأنت زبالة والزبالة برضه بتلم الدبان
مقاتل1: انت بتشتم ليه يا حيوان انت ؟
مقاتل2: بشتم زيك يا حيوان انت
مقاتل1: ما انا لازم اشتمك .. انت ناسى عمايلك ؟
مقاتل2: الظاهر انت اللى ناسى عمايلك
مقاتل1: باقولك ايه .. لم على ما عندك بقه يا خويا
مقاتل2: لآ .. ما تقولش اخويا .. اوعى تقول اخويا
(يشير مقاتل1 بيده فيتجمد وضع مقاتل 2)
رجل1: (يسرد) تقول الاسطورة ان الصراع الاول على هذه الارض كان بين اخويين
.
مقاتل1: (يعود للحالة ) ده انت لو اخويا اموت نفسى (يتجمد )
رجل2: (يسرد) كان حسم هذا الصراع بيد الاله وحده اذ اقترح الاب ان يقدم كلا
منهما قربانا للاله .
مقاتل2: (يعود للحالة) تموت نفسك ليه وانا رحت فين ؟
رجل1: (يسرد) وقدمت قربانا من حصاد ارضك اذ كنت انت هابيل الطيب وقدم هو
قربانا من بهائمه اذ كان قابيل راعيا للماشية .
مقاتل1: (يعود للحالة) انا اللى ح دبحك .. ح فصل راسك عن جسمك
رجل2: (يسرد) وانتظرت حتى تقبل الالهه ثمارك ورفض ذبيحته اذ كنت انت هابيل
الطيب .
مقاتل2: (يعود للحالة) انت فاكرنى سهل ده انا اكلك بسنانى .
رجل1: وثارت ثورة قابيل وتمكن الحقد من قلبه فرفع حجرا ثقيلا وتسلل ساعة
نومك وهبط بالحجر فوق راسك وقتلك .
مقاتل1: (يعود للحالة ) تار
بتار.... ودم بدم
رجل2: (يسرد) وعندما احتار قابيل القاتل ف امر جثتك ارسل الاله له غرابين
قتل احدهما الاخر ودفن جثته ففعل هو بالمثل وواراك التراب .
مقاتل2: (يعود للحالة) لكن الحق ما بيموتش .. سامع ما بيموتش
(يشتبكان ويضربان بعضهما البعض بالرؤس )
مقاتل1: قاتل (بالرأس)
مقاتل2: جبان (بالرأس )
المقاتلين: (خبطة ثالثة) ...
اااااه (يقعان على الارض كلا منهما ممسكا برأسه)
* نقلة اضاءة*
(الرجلان امام المائدة فى هدوء شديد )
رجل1:انا بعد قراءة متأنية للوضع الراهن اعتقد انى توصلت لحل مناسب ليا و
ليك على كافة الاصعدة
رجل2: انت عارف ان اهم حاجة عندى الاصعدة
رجل1: اطمئن .. انا بس عايزك تاخده بشويش
رجل2: اخده بشويش ؟ّّّ!!
رجل1: قصدى الحل .. يعنى تاخده بلا انفعال .. تاخده بتانى
رجل2: طبعا قصدك الحل
رجل1: طبعا .. وانت هتشوف قد ايه الحل ده بينم عن احترام متبادل بينى وبينك
ومحبة كمان ...
رجل2: طب اتفضل
رجل1: ( يتناول الحقيبة ) ... انا ح طلعه
رجل2: ايه ؟
رجل1: من الشنطة واتمنى انه ينال اعجابك (يخرج حبل من الحقيبة) ها ايه رايك
؟
رجل2: ايه ده ؟
رجل1: ده حل يرضى جميع الاطراف .. ومالوش غير طرفين انا وانت .. طرف ح يبقى
ف ايدى
رجل2: والتانى ف ايدى
رجل1: لآ .. مش ف ايدك
رجل2: (منفعلا) انت ايه حكايتك بالظبط !
رجل1: ح يبقى حوالين رقبتك (يربط الحل حول رقبه رجل2 ويجره كالحمار ) شى ... حااا ... شى
رجل2: انت كده بتعاملنى كأنى حمار
رجل1: كأنك ؟ّّّ!!
رجل2: (ينتزع الحبل ) انا برفض الحلول اللى من النوع ده
رجل1: يعنى ايه ؟
رجل2: يعنى المناقشة انتهت بينى وبينك .
* نقلة اضاءة*
( المقاتلين كلا منهما ممسك براسه )
مقاتل1: اه .. اذكرالان بعض الاشياء .. اعتقد انها عن امى .. امى كانت ست
طيبة .. نفسها حلو ف الاكل .. تخينه شوية زى معظم الامهات الطيبين ..بتشهق ف تقلية
الملوخية وبتتشائم لو انا خطيت فوق الغسيل .. بتتابع المسلسلات ,بتصلى طبعا ,
بتعتقد ف السحر والعفاريت والاعمال .. بتحب جيرانها , عندها عشة فراخ فوق السطوح
.. عشة فيها فراخ كتير وفيها ديك واحد .. ديك واحد بس. كانت امى بتحبه اوى . امى
كان نفسها تجوزنى .. كان عندها استعداد تعمل المستحيل .. فاكرة ان المستحيل زى
زمان ممكن حد يقهره . لكن انا عشان كنت عارف مستحيل النهارده وكنت عارف ان الارض
دلوقتى ممكن تدفن عيالها بالحيا وتكسر عضمهم .. سافرت وقلت لما ارجع ابقى افرحها
بالجواز .. لفيت الدنيا .. لما رجعت كان ممكن اتجوز لكن مبقاش فيه امى .. وماعدش
حد بيشوف المسلسل ولا حد بيشهق ف الملوخية .. ولا حتى فى جيران .. لكن العشة اللى
فوق السطوح كانت لسه موجودة .. جريت عليها وفتحتها .. لاقيت الفراخ وبس .. ما
لقيتش الديك بتاع امى .. حد طلعه من العشة ( ينفعل ) انا عايز اعرف مين اللى طلعه
من العشة (يلوح بسلاحه)عايز اعرف مين اللى طلع ديك امى ؟
رجل1: (فى الموبايل ) ... انا ؟! انا بحبه بانيه او مشوى ف الفرن , لومش
هيكفى ممكن نزود .. اى واحد امه عندها ديك دخلته العشة ح اطلعه ... باى باى .
مقاتل2: (ممسكا راسه) اتذكر شيئا ما .. اتذكربيتا ..شارعا.. مدرسة .. اطفال
.. شاطئ .. مدينة .. نعم انها مدينتى . (يحكى) فى مدينة تغرد فيها البلابل ليل
نهار , بل ويزيد تغريدها ليلا كنت اعيش , حيث اعتاد الناس اذا ما جاء الى الحياة
طفلا ذكرا , ان يشترى له ابوه بلبلا يغرد , وكلما كبر الطفل واشتد عوده , زادت
الحان البلبل روعة وتنوع , وكلما غردت البلابل اكثر , كلما فرح الاباء , فى مدينة
تقدر فيها مقادير الرجال بتغريد البلابل , كنت احيا شابا فتيا
وشفتها , بنت صوتها ارق من ورق الوردة الحمرا و عنيها فى براءة الملايكة
,جسمها جسم شيطانه رجيمة يعلمك ان الجحيم اوقات يبقى جنة , لكن عشان ادخل الجنة دى
, لازم اعمل زى قواعد مدينتنا ما بتقول واروح اقابل ابوها , حددتلى ميعاد وفى
اليوم الموعود , وقفت امام مرأتى , ارتديت افضل ثيابى ووضعت افخر عطورى, واخذت
بلبلى المغرد ووضعته على كتفى الايسر , وخرجت ذاهبا الى بيت حبيبتى , نزلت الشارع
,لاقيت كل الالوان وردى , والناس كانها بترقص عشانى , والتاكس اللى ركبته كان كأنه
حصان ابيض بجناحين , وطول السكة البلبل على كتفى عمال يغنى وصوته يعلى اكتر واكتر
, ما سكتش غير لما دخلت بيت عروستى , يمكن انكسف , قابلت ابوها , قبل ما اتكلم ,
بص على كتفى الشمال وابتسم بسخرية وقاللى : الزيارة انتهت .. فى مدينتنا من العار
ان يزوج الاب ابنته لرجل بلا بلبل , اتسرق لكن امتى ؟ وفين ؟ ومين اللى سرقه ؟
رجل2: احنا اللى خدناه .. لكن ما هياش سرقة بالمعنى المفهوم .. انما ضمان
لتوفير الهدوء ف المدينة .. لان البلابل بقت بتسبب تلوث ضوضائى وسمعى شديد جداا ..
وبتمنع المفكرين من انهم يفكروا , والمخططين من انهم يخططوا ... حاجة صعبة جدا ..
لذلك امرنا بجمع كل بلابلكم وتصديرها للخارج وبفلوسها ح نوفرلكم خدمات بديلة ....
شكرا . (اصوات تصفيق )
مقاتل1: يعنى انت مالكش دعوه بديك امى ؟
مقاتل2: ده اذا انت كان ليك علاقة بسرقة بلبلى .!
(يضحكان مكتشفان المسألة .. يغرقان ف الضحك و يحولان مسار السلك ليصبح بشكل
افقى )
مقاتل1: انا لست قابيل (يمد له
يده)
مقاتل2: ولا انا (يصافحه )
* نقلة اضاءة*
(الرجلين رجل1 وقد ارتدى فى معصمه شعار النازية ورجل2 وقد ارتدى فى معصمه
علم بريطانيا )
رجل1: ان الرايخ قلق للغاية .. يعنى قاعد لا على حامى ولا على بارد .. ويرى
ان الامر جلل .
رجل2: وماذا فى الامر .. انه امر عبيط جداا
رجل1: عبيط جدا ؟! هذا من وجهة نظركم ,اما من وجهة نظر الرايخ .. تربة
جامده كيك ومش ح تعدى على خير .
رجل2: لا ادرى لماذا تأفورون المسألة بمثل هذة الافورة .. كبروا دماغكم
قليلا وكله هيبقى فل .
رجل1: ان الفل يصيب انف الرايخ بالزكام , وتصبح المسألة , مسألة امن قومى .
رجل2: عجيب امركم ايها الالمان , عينكوا فيه وتقولوا اخييه .
رجل1: وعجيب امركم ايها الحلفاء , كفتاه تريد المضاجعة وخايفة م الحبل .
رجل2: (ينهض) هى اهانة لن تغفرها دولنا .
رجل1: (ينهض) انما هى وصمة عار فى جبين الجنس الآرى انقى واعظم اجناس الارض
.
رجل2: اللى ف قلعك انفضه , يا نازى يا فاشى يا وحش.
رجل1: (باستنكار) وحش !! اذن هى الحرب بيننا وبينكم وليكن الحديث للمدافع .
رجل2: ولتكتب الدماء نهاية لتلك القضية
(يعيدان السلك الشائك كما كان )
الرجلين : (يصيحان ) ..... هجوووووووم .
(اصوات طلقات رصاص وارتعاشات اضاءة )
(بؤرة اضاءة على البانوراما البيضاء ف الخلفية )
(موسيقى )
(اصوات متتابعة لناس الحرب )
صوت1: بترت ساقى .. كنت اعظم لاعب كرة قدم .
(دماء على البانوراما )
صوت2: نعم .. تجاه الرأس .. بين العينين .. صوب
(طلقات رصاص ) (دماء على البانوراما )
صوت3: عندما اموت اخبروا امى ان ثالث ابناءها قد ذهب الى اخويه . (دماء على البانوراما)
صوت4: لم اعد استطيع الشعور بنصفى
الاسفل .. الديدان ترعى فى جسدى انها الغرغرينا .
صوت5: ليمنحه احدكم رصاصة الرحمة .
(دماء على البانوراما )
صوت6: (ابن) ابى هذا الخطاب العاشر الذى ابعث به اليك .. متى ستعود ؟
ولماذا لاتجيب ؟. (دماء على
البانوراما)
صوت7: اذهب الى زوجتى بهذا الخطاب فأذا كانت قد وضعت مولودها فلتخبره بأن
اباك فى الحرب وانه يحارب من اجل ,من اجل
. (دماء على
البانوراما )
صوت8: اوتعتقد يا صديقى انه مازالت هناك امراة مخلصة لزوجها بعد مضى كل هذه
المدة . ( دماء على البانوراما)
صوت9: طائراتهم تحلق فوقنا .. اننا
هاكلون .. هاكلون
(دماء على البانوراما)
صوت10: يا ابانا الذى فى السماوات , تقدس اسمك ,فلترحمنا عذاب التجربة ,
ارحمناعذاب التجربة . (دماء على
البانوراما )
صوت11: اننا نحارب من اجل هدف سامى , من اجل الحق , من اجل , من اجل ....
( دماء على البانوراما )
(تعلو اصوات الطلقات وترتعش الاضاءة على البانوراما التى صارت حمراء)
(المقاتلين على جانبى السلك وبيد كل منهما مسدس ومتحفزا للآخر )
مقاتل1: استسلم الان ايها المهزوم
مقاتل2:بل استسلم انت
مقاتل1: انا منتصر
مقاتل2: وانا أؤدى واجبى .. فقد كلفونى بحماية هؤلاء الجرحى
مقاتل1: يا للهول .. هو مستشفى للجرحى اذن .؟
مقاتل2: نعم ولن ادعك تمر الا من فوق جثتى .
مقاتل1: اللعنة , يا الهى لقد كلفونى بتفقد هذا المكان للتأكد من عدم وجود
احياء فيه .
مقاتل2: اطمئن لايوجد احياء بالداخل لقد مات كل الجرحى الذين كنت احميهم
لامعنى الان لمهمتك .
مقاتل1: ماتوا ؟! اذن ماذا تفعل هنا ؟! لا معنى لمهمتك انت ايضا .
مقاتل2: اعلم هذا .. ولكن ما الذى له معنى فى الامر برمته ؟
مقاتل1: ماذا تقصد ؟
مقاتل2:سلسلة من القتل لا تنتهى .. تصعد روح القتيل الى بارئها ويتحول قلب
القاتل الى فولاذ وضميره جثة سقت بجوار اول قتيل قتله ويصبح بداخله قبرا .. لامعنى
للامر صدقنى
مقاتل1: اذا القى بسلاحك .
مقاتل2: ماذا ؟ّّ
مقاتل1: القى بسلاحك ما دام هذا ما تؤمن به .. القيه الى اذا كنت محقا فيما
تقول ....
مقاتل2: (يبتسم فى مرارة ) (يلقى
بسلاحه) ليس لسلاحى هذا ايضا معنى .
مقاتل1: ابهذه االسهولة تلقى بسلاحك وتستقبل قتلى لك .
مقاتل2: فارغ .. انه سلاح فارغ , بلا طلقات .
مقاتل1: ماذا ؟ تحارب وتؤدى مهماتك بسلاح بلا طلقات , مجنون انت ؟
مقاتل2: هكذا قالوا عنى عندما اخبرتهم انى لم اخلق لآقتل وان هذا ليس سلاحى
(يخرج أله موسيقية من ملابسه ) وانما هذا هو سلاحى
مقاتل1: ما هذا اله موسيقية ؟!
مقاتل2: انا شاعر وموسيقى قلت لهم فلنغزو القلوب بالموسيقى والغناء ولتتنحى
الدبابات والمدافع جانبا .. ولتتكلم الفرشاة والالوان فتصبح ساحة المعركة هى جنة
الله على الارض .
مقاتل1: اهانوك وسخروا منك واتهموك بالجنون ....
مقاتل2: هذا ما حدث ... على كل حال ارجو منك ان تقتلنى سريعا بلا عذاب وانا
احتضن اّلتى فقد شبعت عذابا .
مقاتل1: حسنا استعد لتلاقى قدرك ايها الفنان المرهف .
مقاتل2: حسنا هيا اطلق نارك ... اضرب .
مقاتل1: (يضرب فأذا بمسدسه فارغا ) ها قد ضرب .
مقاتل2: (يرفع راسه غير مصدق ) انت ايضا .. انت ايضا.
(يضحكان )
مقاتل1: نعم انا ايضا , عندما تقتل شخصا , فأنك لاتزهق روحه فقط , بل تزهق
حلما , تقتل حياة بكاملها , تقتل احلاما اخرى تحيط به وبحلمه , تقتل الناس جميعا ,
وهكذا أؤمن انا وصديقى .
مقاتل2: صديقك ؟!!
مقاتل1: نعم سأعرفك عليه ...(يخرج من طيات ملابسه عروسه)
اقدم لك صديقى السيد خشبو فأنا اصنع العرائس , واجعلها ترقص ايضا ,انظر
اليه , لقد صنعت له عينين تحملان فى نظرتيهما عذابات البشرية وبرائتها , وله انف
تشم رائحة الزهور والفتيات الجميلات والطبيخ الذى تصنعه الامهات الحنون , وأذن
تنصت الى دقات قلوب البشر وتترجمها كلمات , ولسان داخل فمه ينطق بالحق والجمال ,
وله يدان ,قدمان , يعرفان طريقهما الى الرقص .
مقاتل2: انت رائع .. فلنرقص على اغنيتى الجديد يا خشبو .
(يحولان السلك
الشائك )
مقاتل1: فلنرقص اذن يا خشبو ولنغنى عن انفسنا
( يغنيان )
يحكي أن ..قلب اتنطط صفر غني
يحكي أن..انه بقلمه رسم الجنة
قالوا عليه كداب مجنون
خده ألوانه لون ورا لون
هان واتهان واهو هام في الكون
لا بقي بيحلم ولا يتمني
يحكي أن....
(بؤرة اضاءة مقاتل1 يحرك العروسة ومقاتل 2 يعزف )
(نقلة اضاءة )
(الرجلان 1,2 مقبلان على مفاوضة جديدة )
رجل1:(يصافحه) .. اهلا اهلا اهلا (يقبله) .. حبيبى .. (يعانقه)
واحشنى جدا .. اه لو تعرف انا مفتقدك قد ايه ؟
رجل2: (مندهشا ) ... اهلا .
رجل1: انا اخيرا اهتديت للحل وعرفت سر عدم التواصل بينى وبينك .
رجل2: ده شئ يسعدنى لو حصل .
رجل1: الازمة بينى وبينك بتكمن فى فتور العلاقة .. جمود المشاعر .. خشونة
الحديث , احنا محتاجين ان الحديث بينا ياخد مجرى تانى , بأختصار محتاجين شئ من
الحميمية .
رجل2: ما عنديش مانع , لكن ايه هى اسس ومعايير واّليات الحميمية دى ؟
رجل1: (يخرج من حقيبته قميص نوم حريمى ) ألبس بس ده , وبعدين نتكلم ف الاسس
والمعايير والاّليات (يلبسه القميص )
رجل2: ادينا لبسنا , ايه الاسس بقى ؟
رجل1: انا ح عتمد على التدخل المباشر وانت ح تعتمد على القاعدة العريضة .
رجل2: ايه؟ّّ!!
رجل1: وثق تماما ان تدخلى المباشر فى قاعدتك العريضة هو اللى ح يخلق
الحميمية بينى وبينك .
رجل2: (مفكرا) .. اه .. (يخرج من حقيبته قميص نوم اخر ) طب خد ألبس ده .
رجل1: أيه ده ؟
رجل2: ألبس بس .
(رجل1
يرتدى القميص )
رجل1: ايه دخل ده بالحل المقترح ؟
رجل2: ده معاملة بالمثل , وبعدين هى السياسة ايه غير حميمية متبادلة , ما
تنساش ان انت كمان عندك قاعدة عريضة , وان انا كمان عندى امكانية التدخل المباشر .
رجل1: (يخلع القميص بغضب ) .. انا برفض , دى فكرة مضاجعة مش حلول سياسية .
رجل2: (يخلع القميص بغضب ) .. واللى انت عايز تعمله مش مضاجعة برضه ؟
رجل1: انا كنت عايز اخفف حدة التوتر بينى وبينك .
رجل2: وانا كمان .
رجل1: لكن ه ما يرضيش اّلهى .
رجل2: ولا يرضى اّلهى .
رجل1: كده الخلاف وسع اوى .
رجل2: وسع اوى اوى .
(يعيدان السلك)
(نقلة اضاءة على المقاتلين كلا منهما يصلى لآلهه )
مقاتل1: أّلهى , ايها العصفور المحلق , امنحنى اليقين والثبات , خلصنى من
الشرور التى تحيط بى .
مقاتل2: ايها العصفور الواقف فوق الغصن , نجنى, الهلاك دائرة تضيق وانا فى
منتصفها .
مقاتل1: خلصنى .
مقاتل2: نجنى.
مقاتل1: انت العصفور المحلق رمز الحرية والجمال .
(يلاحظ ان الرجلان لف كلا منهما ملائة بيضاء حوله وتدخلا ف الحوار )
رجل2: يقصد ان الهك رمز القسوة والغباء.
مقاتل2: انت العصفور الواقف فوق الغصن رمز الخير والنماء.
رجل1: يقصد ان الهك رمز الخراب والتدمير .
مقاتل1: انت اللى عالم وشايف وعارفنى .
رجل2: يقصد ان أّلهك جاهل واعمى .
مقاتل2: انت اللى فاهم ورحيم .
رجل1: يقصد ان أّلهك غبى , قاسى .
مقاتل1: بستعين بقدرتك اللامحدودة .
رجل2: يقصد ان الهك عاجز.
مقاتل2: عشمان فى عطائك وغناك .
رجل1: يقصد ان أّلهك فقير.
المقاتلان : الرحمة .
رجل1: ألا فى سب الآله .
رجل2: كيف تتحمل كل هذا السب فى أّلهك .
رجل1: ستخسر دنياك بلا جدال .
رجل2: وأى جحيم ينتظرك فى عالم ما بعد الموت .
رجل1: اقتله واثأرلدينك ,(يعطية حديدة )
رجل2: هذا دنس لايطهره ألا الدم (يعطيه حديدة)
الرجلان : الدم .
(المقاتلان يتهجمان على بعضهما )
مقاتل2: انت ازاى بتشتم أّلهى ؟
مقاتل1: انت اللى بتشتم أّلهى .
مقاتل2: المرة دى الموضوع فاق كل الحدود .
مقاتل1: فعلا, فاق الجيرة والصحوبية والعيش والملح .
مقاتل2: فاق الغنا والتفاهم وكل المشاعر النبيلة .
مقاتل1: كان كله الا كده , يا كافر (يضرب والثانى يصد)
مقاتل2: انت اللى كافر وف ضلال (يضرب والاخر يصد)
مقاتل1: العصفور المحلق ما وصناش غير على المحبة والتسامح والغفران . (يضرب والاخر يصد )
مقاتل2: والعصفور اللى على الغصن
تعاليمه كلها للحق والخير والجمال . (يضرب والاخر يصد ) (تتقاطع الحديدتان )
(يدوران ويدور معهما السلك اثناء الصراع ليصبح كلا منهما فى ارض الاخر )
مقاتل1: بتهين العصفور ليه يا ابن الكلب ؟
مقاتل2: بتسب العصفور ليه يا وسخ يا نجس ؟
(يسقط كلا منهما فى ارض الاخر من
قوة الدفع )
مقاتل1:(يشير لطوطم1) .. العصفور هو الحاجة الوحيدة اللى باقيه ف دنيا
زايله .
مقاتل2: العصفور هو الحقيقة الوحيدة فى كون كداب (لطوطم 1)
مقاتل1: العصفور هو اللى ... (ينظر لطوطم 1) العصفور... العصفور .....
مقاتل2: العصفور ..(متأملا طوطم1) .. انت بتعبد العصفور زيى .
مقاتل1: انت , انت بتعبد العصفور زيى ؟
مقاتل2: اومال فين المشكلة . (للناس ) .
مقاتل1: المشكلة اذا كان العصفور طاير ف الجو او واقف ع القفص , معقولة ؟
مقاتل2: ما العصفور حر , العصفور بالذات حر, يطير , يقف ... هو حر .
مقاتل1: يبقى ما فيش اى مشكلة بينى وبينك .
مقاتل2: اطلاقا . ( السلك )
مقاتل2: انا لست قابيلا (صافحه )
مقاتل1: ولا انا .
مقاتل2: انا لااحب القتل .
مقاتل1: وانا لا احب اطلق الرصاص .
مقاتل 1:انا اصنع العرائس .
مقاتل2: وانا شاعر ومسيقى .
مقاتل1: العصفور حر .
مقاتل2: ما لناش الحق نتحكم فى ارادته .
مقاتل1: مليش دعوة بموضوع الديك .
مقاتل2: وانا مليش علاقة بقصة البلبل .
مقاتل1: اصدقاء ؟
مقاتل2: من حقنا الحياة .
مقاتل1: من حقنا الحياة .
(يتعانقان )
(اغنية من حقنا الحياة
)
رجل1:حياة؟ّ!.... حياة ؟!!
رجل2: حياة ؟! ...(يضحكان بشدة ,وكل منهما ياتى بدراع بلاى ستيشن ذو سلك
طويل يضع طرفه فى ظهر مقاتله دون ان يشعر )
مقاتل1: صدقنى يا صاحبى .. ايدى اللى اتمدتلك بالخير قلبى هو اللى حركها ,
وهتفضل ممدودة ليك بالخير (يصفعه بشدة) .
مقاتل2: ايه ده ؟
رجل2: fight
مقاتل1: مش عارف , صدقنى مش عارف (الرجلان يلعبان ويضحكان )
مقاتل2: حتى لو ده حصل منك .. انا مسامحك (يضربه بقدمه )
ايه اللى بيحصل ده ؟ انا مش قاصد اعمل كده .
مقاتل1: معلش ما يهمكش .. ما يهمكش (يضربه ويواصل الضرب)
رجل1: finish him (يتجشأ مقاتل1 فى وجه 2 )
مقاتل2: (يصرخ بشدة )
رجل2: لسه , كده واحد /صفر,خش ع الجولة التانية .
(يتخذ المقاتلين موقعهما بشكل أّلى متخذين وضع القتال)
مقاتل1: هو فى ايه ؟
مقاتل2: مش عارف .
رجل1: fight .
مقاتل1: ايدى مش عايزة تضربك , بس غصب عنى (يضربه )
مقاتل2: رجلى مش عايزة تأذيك , بس مش بمزاجى (يضربه)
مقاتل1: انا ليه مسلوب الارادة ؟
مقاتل2: انا مش انا (يضربه ) .. انا فين ؟
(يواصل الضرب )
رجل2: finish him .
(مقاتل2 يصدر مؤخرته فى وجه1 ويطلق ريحا )
مقاتل1 : (يصرخ بشدة ).
رجل1: اوكى , كده واحد/واحد .. استعد للجولة الحاسمة .
( المقاتلان يتخذان وضع
القتال)
مقاتل1: انا مش قادر افهم ايه معنى اانى اعمل حاجة مش عايزها ؟
رجل1:fight .
مقاتل2: انا خلاص اتصالحت مع نفسى .
رجل2: fight .
مقاتل1: الحقيقة وضحت قصادى , عايز اعيش .
الرجلان : fight .
مقاتل2: بكره القتل .. انا مخلوق للسلام بس .
الرجلان : fight.
(المقاتلان يرفعان يديهما
,اليدان ترتعشان ,بمجهود مضنى يصل كلا منهما الى السلك وينزعه )
المقاتلان : لالالا....(يصرخان)..... لا اااه .
رجل1: لقد اختل الميزان .
رجل2: يجب التصرف سريعا (يتحركان
بسرعة محمومة,ويعيدان السلك كما كان , كلا منهما يمسك مقاتله )
رجل1: تذكرجيدا لماذا انت هنا .
رجل2: انت هنا من اجل عدوك .
رجل1: مل لم تفعله , سيفعله هو .
رجل2: انه خلف هذا السلك الشائك .
رجل1: انه يكرهك .
رجل2: يتمنى الفتك بك .
رجل1: يريد ان يتعدى هذا السلك .
رجل2: ليجردك من قطعة ارضك .
رجل1: من شرفك .
رجل2: من حياتك.
رجل1: تذكر سلاحك (يعطيهما الاسلحة ويصوبان نحوبعضهما )
رجل2: تذكر علمك .
رجل1: تذكر أّلهك .
رجل2: تذكر.. لايوجد امل للحوار بينكما الا بالسلاح .
رجل1: القتل فى الوقت المناسب وحين يصدر الامر.
رجل2: وها قدر صدر الامر .
رجل1: اقتله .
رجل2: اقتله.
(المقاتلان وقد بدأ يبكيان تقريبا من عبأ الضغط )
مقاتل 1: و لكنه ليس قبيلا
رجلان: اقتله
مقاتل2: هو يصنع العراءس و انا
اعزف الموسيقى
رجلان: اقتله
مقاتل1: ليس لكلانا علاقه بمساله
البلبل والديك
رجلان: اقتله
مقاتل2: كلانا لا يحب القتل
رجلان: اقتله....او تقتل انت
(يشير كل رجل بدله سلاحه بطريقه بها تهديد للمقاتلين ثم يضطر كل مقاتل
باشهار سلاحه في راس الاخر وذلك بتردد و خوف و قلق شديد و بطء)
مقاتل1: يحكى ان
مقاتل2: قلب اتنطط صفر غنى...يحكى
ان
مقاتل1: ان بقلمه رسم الجنه.. يحك....
(موسيقى يحكى ان تبدا من صوت منخفض الى اعلى وذلك بعكس الاضاءه تضمحل شيئا
فشيئا ويسمع فى النهايه اطلاق الرصاص)
black
سامح عثمان
2009
بوسترات لبعض عروض للنص
التعليقات على الموضوع