النص المسرحي ( واي فاي ) تأليف / سامح عثمان
واي فاي
تأليف
سامح عثمان
شخصيات السايبر
. مدير السايبر
. العجوز
. المثقف
. المتطرف
. النسوانجي
. المزدوجه
. لاعب 1
. لاعب 2
. الأم
. الزوجه
. العاطل
. الممثل
. المطربه
. النادل
المكان
(نت كافيه .....مقهي انترنت....سايبر)
. الممثلين جميعهم جالسين امام اجهزة الكمبيوتر ماعدا النادل (لم يدخل بعد)
. الزوجه تشارك الام نفس الجهاز
. موسيقي معدنيه متكرره النغمه قاسية الاحساس ...نسمعها بينما يتمايل علي انغامها الجميع اماما وخلفا فقط بشكل آلي جداا ...شبه معدوم الحياه
. مدير السايبر يتابع الجميع وبدا كما لو كان هو الوحيد الذي يتحرك بشكل انسيابي وحر
. يمر عليهم المدير واحدا تلو الآخر كما لو كان يتفقدهم ....دون ان يشعرون به أو بالعالم.......
. يقترب من مكتبه ويلتقط قابص كبير جدااا عملاق ...بدا كما لو كان موصولا بكافة الأجهزه
. يضع القابص في فيشة الكهرباء....فتقف الموسيقي الآليه وتتغير الإضاءه وتدب الحياه فجأه في الممثلين
. الكل يتحدث امام جهازه (البعض يكتب علي الكيبورد ) والجميع يضع الهيدفون علي اذنه....
. لا احد له علاقه بالآخر الا فيما ندر...
العجوز – اقر انا الموقع ادناه...وانا في كامل قواي العقليه...
العاطل – اني ماينفعش اشتغل بتاع امن...اومال الليسانس ده اعمل بيه ايه؟؟!..
لاعب 1 – (ينهض بشكل مفاجئ) ..(للاعب 2 )......البسه يامعلم
( اصوات تشجيع كروي)...جونك اوفسايد يابيه....تسلل
المثقف – تسلل هذه الأفكار اللامنتميه لنا الي مجتمع مثل مجتمعنا..غير
متناغم مع حضاره بحجم حضارتنا...ولن يستمر
طويلا ...باختصار كل ده زوبعه
في فنجان ..مش هتاخد وقت طويل..
النسوانجي – وبراحتنا خالص وعلي الراسي...,وعلي الهادي...هاتشوفي الهوايل...ده انا اسد..اسد
عارفه يعني ايه اسد...؟!...اسد بس فين ال.... اللي تقدر؟؟!
المزدوجه – (تضحك بخلاعه) ..يا قليل الأدب ..(يلتفت لها النسوانجي)
النسوانجي – (يخلع السماعات من اذنيه ويصفق بيديه)
واضح ان اللايف
احلي بكتير...اموت انا في البث المباشر
أنا أسد وبادور علي...
المزدوجه – (تلتفت له في غضب)...احترم نفسك علشان ماضربكش بالجزمه
خليك في حالك يا قليل الأدب
( يعود لعالمه خائبا ويرتدي السماعات وكذلك تعود هي لعالمها)
النسوانجي – (في الهيدفون) لا مؤاخذه يا قطه....السكاي بي بيقطع شويه
( للمزدوجه) ...بكره تندمي ياقطه
الممثل – (يؤدي امام شاشته اوفر آكت)....فيرجينيا الجميله ..في ليلة أقل
جمالا
من هذه الليله سوف تأتين الي خيمتي راكعة علي ركبتيكي
المتطرف – حرام...ِشرك...كفر...استشري الفساد في البر والبحر...عمت
الفاحشه...
ساد
الفجر...الكاسيات العاريات في كل مكان يا سيدنا..أري ان النصح
والإرشاد لم يعد له
معني في هذا المجتمع الكافر....لقد حق الجهاد...
لقد حق الجهاد
الأم – يابني حرام عليك...ارجع بقي ...تعبت واتهد حيلي...سنين وانت في بلاد
الجاز
في نهاية الامر بلاد غريبه عننا...أرجع
بقي ..أمك تعبت واتهد حيلها...
أدينا مستورين
والحمدلله...يابني لو ماكانش عشاني ارجع علشان مراتك..
( تخفض صوتها)...يا بني
الكلام عيب ..اديلك غايب عنها قد ايه
( تهب الزوجه لتخطف المايك من الأم وتحادث زوجها)
الزوجه – ايه يا اخي؟؟!!...فيه كده في الدنيا ؟!....بقي عندنا غسالة
اتوماتيك
بتغسل الغسيل
لوحدها...وغسالة صحون بتغسل الاطباق لوحدها..
ولامبه بتنور لما
النور بيقطع برضه لوحدها...كل حاجه بتعمل كل
حاجه لوحدها....لكن
انا... مراتك ماينفعش تنام ..
(تتدارك نفسها فتلتفت
حولها وتخفض صوتها)...ماينفعش تنام وتقوم
وتقعد لوحدها كده يا خويا
المثقف – في هذه الحاله لا يوجد الا بديل واحد حتمي
النسوانجي – أنا ....و جاهز لتوصيل الطلبات للمنازل
لاعب 2 – دينجرز بلاي....لعبه خطر....كارت اصفر يا جميل
المتطرف – كفر....كفر
العاطل – الفراغ يعمل اكتر من كده
العجوز – اكتر من كده بكتير...التركه كبيره قوي
لاعب 1 – قوي علي نفسك يا حبيبي...ده انا هاهريك اجوان
الأم – كفايه يا بني...كفايه
الزوجه – لحد هنا وكفايه
المزدوجه – دي آخر حدودي النت وبس ..انا بنت متربيه
الممثل – (يشخص)...بنتك بتخني يا باشا...وفين ؟!..في اوضة نومي وعلي سريري
ومع مين؟!....مع اعز
صحابي
(تداخل لأصوات الجميع)
المطربه – (تغني جزء من اغنية منير)
يا معلقين ع المراجيح والحبل مستورد
فاخر
ليليتكوا فاتت زي
الريح ماهي كل حاجه وليها آخر
بس الحقيقه
المذهله..ان الجميع في السلسله
فوق الرقاب يا
معلقين احبال قطيفه مدلدله
حكم الجراد اشكال
وانواع حاطط علي الأخضر بيحش
له الف ماركه والف دراع وكل يوم بيبدل وش
( قرب انتهاء الأغنيه يكون النادل قد دخل موزعا بعض المشروبات علي الجمهور ورواد السايبر )
النادل –
سايبر...ماشي....سايبر....ومالو...ٍسايبر...عادي..ماكنتش عارف يعني ايه
...لحد ما فهمت لما
شفت...لاقيته شوية ناس مديه ظهرها لبعض..وبيكلموا
ناس تانيه
بالمراسله...مع ان ممكن بسهوله لو كل واحد بص وراه او بص
جنبه...يتكلموا مع بعض
بشكل اسهل........له في خلقه شؤون...
(ينظر للصينيه التي في يده)
الكبير طالب شاي...(يذهب
ويضع الشاي امام المدير)
شايك يا كبير....(ينظر
للناس)..
زمان
...زمااااان....الراجل ده ماكانش كده..آه واللهي....كان كده
(يلبسه عباءة معلم من زمن
ثورة 19).......والناس دي كانت كده
(جميعهم يستديرون و يهتفون) (مع تغير ملائم في الإضاءه والموسيقي)
مج – سعد سعد يحيا سعد
المدير – (المعلم) خد هنا يا واد
النادل – اوامرك يا معلمي
المعلم – (يعطيه من جوار المكتب بدله)...خد بدله الظابط دي وصلها لعمر
الشريف
علشان الست زبيده ما قدرتش تيجي تاخدها
النادل – زبيده مين يا معلمي..؟
المعلم – زبيده ثروت يا بأف
النادل – آه ..في بيت عم حسين رياض
المعلم – مزبوط...بس اوعي حسن يوسف يشوفك
النادل – وجب يا معلمي...وانا عبيط؟!..ده في بيتهم رجل وهاتبقي مش لطيفه
المعلم – استني ...خد ع السكه وانت ماشي ..(يعطيه حقيبه من تحت المكتب)
ادي المنشورات دي لصلاح
قابيل ..علشان عزت العلايلي صوته رايح
من كتر الهتاف
(ينهض ممثل ليقلد هتاف عزت العلايلي في فيلم بين القصرين)
عزت – الاستقلال التام او الموت الزؤام
مج – (يكررون)
عزت – نموت نموت ويحيا الوطن
مج – (يكررون)
عزت – (يسعل)
مج – (يسعلون)
المعلم – تعب وصوته اتنبح ...والناس لبعضها...لازم نشيلو....ادي المنشورات
دي
لصلاح قابيل وقولوا
المعلم بيقولك هو هايخلص حوار زيزي البدراوي
والشيكولاته اللي خدتها
من جوني...وطمنه ان الشيكولاته طلع تاريخ
صلاحيتها منتهي
النادل – (خائفا) ..بس يا معلم....بس يا معلم
المعلم – بس ايه...؟؟!!
النادل – بصراحه بقي انا باخاف من سي السيد
المجموعة : سي السيد..؟!
(استدعاء لموسيقي فيلم بين القصرين)
( العجوز مجسدا سي السيد في محل العطارة ومعه مساعده )
( في مشهد موازي ابنه وجارته في شباكين متقابلين يشيرا الي بعضهما وهما في حالة هيام ومحبة والفتاة بيدها زهرة )
المساعد : وتفتكر يا معلم الثورة دي آخرتها ايه..؟
الابن : الجواز طبعا...بس اول ما اتخرج ان شاء الله
سي السيد : بس انا عجبني سعد باشا زغلول قوي..ومخيش في نافوخي
الفتاة : الله...!!..ماتكسفنيش بقي
الابن : انا فيه حاجة مهمة قوي عاوز اقولك عليها
الفتاة : حاجة ايه..؟
( تقتحم سلطانة الطرب مشهد المحل)
السلطانة : العواف
سي السيد : يا اهلا اهلا اهلا...ده احنا زارنا النبي...كرسي اوام للسلطانة يا واد
السلطانة : فينك يا سي السيد..؟...ماحدش بيشوفك ليه..؟
الابن : ابدا...هو بس اوقات كنت بذاكر وانتي عارفة بابا صعب قد ايه
سي السيد : خدامين السلطانة...هات يا واد البضاعة دي قوام
المساعد : وجب يا معلمي
الابن : يعني اقدر اشوفك امتي..؟
السلطانة : هستناك الليلة
الابن : ده جواب كتبتلك فيه كل اللي نفسي اقولك عليه ومكسوف اقولهولك ...واول كلمة فيه ....
السلطانة : (تضحك بخلاعة ) العواف (تغادر )
الفتاة : (بدلال خجلان ) حاضر هابقي اقراه ...(تقذف له شيئا ) خد ...دي حتة شيكولاته
المساعد : وأأيد البضاعة دي ايه يا معلمي
الابن : بس فيه حاجة اخيرة كنت عاوز اقولك عليها
سي السيد : اكتب عندك...بضاعة اتلفها الهوي
( يحمحم في جدية وينهض بعصاه فيسمعه ابنه والفتاة فيهرولان هربا )
الابن : بابا ...بابا
النادل : اهو اللي فط نط مرعوب من ابوه ده كان ثورجي كبير...لا كان بيهمه انجليز ولا القلم السياسي بحاله ..قلب الدنيا هو وصحابه...وماخافش
المطربه – (تغني)....(بينما نعود اثناء الاغنيه الي اجواء السايبر الأصلي)
ما تخافش عليه...انا
واحده زجوريا
في العشق ياروحي واخده البكالوريا
( تغني ما تشاء من الاغنيه ولكن يجب ان تختم ب..البكالوريا)
العاطل – واللهي ولا الدكتوراه حتي نافعه
النسوانجي – ضره...الضره دي لامؤاخذه تبقي بز الجاموسه...
المزدوجه – (بصوت منخفض) سليكون ايه ..؟! لا لا لآ.. طبيعي...مقاس 38
المتطرف – تمانين....وينزلوا جلده جلده علي الضهر في ميدان عام
المثقف – خاص...خاص جداااااا...ده وضع معقد ومتشابك والخلاص منه
أو السيطره عليه شئ مش سهل...مش سهل ابدا
الزوجه – صعب...صعب يا اخويا واللهي...(تهمس)...شرعا ست شهور
سيدنا عمر بن الخطاب قال كده
الأم – ( بتهجم وبصوت مرتفع في المايك) مش كده ابدا يا ابن الكلب.....ارجع بقي يا واطي
لاعب1- عاليه ......فوق العارضه
لاعب 2 – (مسطولا)..عاليه قوي.......استف مجنوووون
العجوز – شرط في الوريث العقل ...لازم يكون عاقل وموزون....وعقله يوزن بلد
الممثل – (يفرد قميص ابيض من قمصان المجانين)....(يقلد حسن البارودي في
فيلم
باب الحديد).....
- تعالي ...تعالي....هاجوزك هنومه يا قناوي يابني....هاجوزك هنومه
المطربه – (تطرب) ياليلي...ياليلي...يا....؟....ياليلي يا..؟
النادل – (يمصمص شفتيه ) ياعيني....ياعيني عليكم...ماحدش حاسس بحد ...كل
واحد فيكم هايم في ملكوته.....وعاطي ضهره للتاني
المدير – (ينادي النادل)....مرحلة الفيس بووووك...
النادل – أبويا...؟؟!!!
المدير – فيس بووك......(بلغه آمره) كل واحد حافظ الباسوورد بتاعه...؟؟
(للنادل).....تعالي ...خد
النادل – آخد؟؟!..زي بعضه (للناس) طول عمري عبد المأمور.......فيس أبوك
. (يذهب اليه النادل ليتسلم
منه صينيه مليئه باكسسورات)
( يبدأ اللف بها علي رواد
السايبر)
(موسيقي مناسبه)
العجوز – (يعطيه النادل زهره)...عندما نصل الي خريف العمر نورث كل ماتبقي
منا الي ربيع جديد ...فالزهره هي الوريث الشرعي للشجرة العتيقه
المثقف – صح جدااااااا
الأم – اي والله عندك حق ياحاج
النادل – (وكأنه الاشعارات في الفيس بوك) الحاجه علقت علي حالتك
النسوانجي – كلام شكله حلو
النادل – اعجب كل من المثقف والنسوانجي بحالتك
العجوز – (يمسك الزهره ويستعد لإلقائها كعروس في ليلة الزفاف)
علي الوريث أن يستعد
لاستقبال التركه
(صوت موسيقي زفاف)
(يتجمعون خلفه جميعهم
في لهفه لالتقاط الزهره)
العجوز – (ينظر لهم ويشم زهرته)...لسه قادر اشم...(ينهرهم)
لسه قادر اشم...(يعودون خائبي الرجاء الي اماكنهم)
المزدوجه – (يعطيها النادل دمية طفله) مش كل الناس زي بعض...بصمات الصوابع بتختلف...رسمة الودان بتختلف ..الطول
..الوزن..لون العينين ..الشعر...حتي مقاس الجزمه
لو ربنا عاوز
يخلقنا كلنا قطعيه واحده كان عمل كربونه كبيره قوي
وطبعنا كلنا من ضهرها وماكانش خلانا نتولد..
النسوانجي – لايك...لايك..لايك
المثقف – فعلا مش كل الناس زي بعض
النادل – شارك المثقف حالتك ...شييييير
المتطرف – اعوذ بالله ...اعوذ بالله
النادل – مافيش ديس لايك...
المزدوجه – (تتغير) دايما باقول كلام وارجع فيه...اللي قولته في البوست اللي فات كلام فارغ ...البني آدم هو الإنسان هو البشر ..وعلي ذلك فاذا قابل الرجل الأزرق المرأه الفوشيا في محيط أصفر فعليه أن يحافظ علي المسافه السوداء بينهما والا فهي قلة أدب وسفاله
(لحظة صمت من الجميع لعدم الفهم بينما يهلل المتطرف)
المتطرف – الله اكبر...الله اكبر..فتح الله عليكي يا اخت
النادل – ده بس ...معجب بحالتك
الأم – (تجسد ام الفتاه) (بادية التقوي)...اسمعي كلام امك..الراجل بتقواه
وبالزبيبه
اللي في اورطه......وكل ماكبرت الزبيبه تطمنيله اكتر
الزوجه – (تجسد خالتها) (تقهقه في خلاعه) فكك من الكلام ده...امك ميته بالحيا..اسمعي كلام خالتك حبيبتك...تعرفي الراجل بريحة برفانه وبشياكة جزمته
المزدوجه – مش باقولكم دايما باكتب بوستات وبارجع فيها
المثقف – (يعطيه النادل كتابا)..الثقافه هي تلك المعرفه التي تبقي بعد ان
تنسي
كل ما قرأت...
(لا احد يستسيغ الكلام
او يفهمه)..(ينظر له النادل ويومئ برأسه نفيا
بمعني انها لم تعجب احد)
المثقف – عندما تموت هذا العام فإن الموت سيتجنبك في العام القادم ..البير
كامي
(لحظة صمت)
(تصفيق مفاجئ من الجميع
وتهليل وصفافير)
(يشير النادل باصبعه الابهام علامة النجاح)
المتطرف – (منفعلا)...استغفر الله العظيم يا اخي...هو الواحد بيموت غير مره واحده ..انتوا كمان هاتحرفوا الثوابت ؟؟!!
المثقف – يا اخي ده تشبيه ....استعاره
المتطرف – ماروحناش بعيد.... الاستعاره علي نسق الدعاره يعني برضه حرام
(الجميع يستنكرون المثقف ويراجعون انفسهم في الاعجاب بجملة المثقف)
النادل – لا احد معجب بذلك حاليا
(المثقف يضرب كفا بكف
مندهشا)
المثقف – (ينفعل) هو انتوا ليه مش راضيين تفهموني...؟!..ليه مش عارفين نتواصل..
(يتجمعون حوله واحدا تلو الآخر حتي يكونون حلقه)
المزدوجه – انت كلامك واضح جدا .. بس غامض قوي
العاطل – كلامك ده تضييع وقت ..وانا مش فاضي
الزوجه – الكلام لوحده ماينفعش ...لازم فعل
العجوز – شكلك ماينفعش تبقي الوريث
المتطرف- كلامك خارج المله واهدار دمك فضيله
(يدور حوله اللاعبين وهما يدخنان المخدرات)
اللاعبين – (يرددان بشكل آلي) حرام...حرام
الممثل – (يمثل مايم مع نفسه مجسدا صراعا داخليا)
الأم – انت هاتبقي زي الفل..انت بس ملبوس ومحتاج زار
النادل – (ينادي) وعندك واحد زار
( نسمع موسيقي زار مصحوبه
بآهات المطربه)
(الجميع يدورون حول المثقف
ويقطعون الكثير من الكتب والاوراق
ويبعثرونها فوق رأسه وهو في حالة اضطراب)
الأم – (مع انتهاء الحاله) كان راكبه جني... جني وراح لحاله
المثقف – ماتخلقش اللي يعرف يركبني يا شوية خرفان
(يذهب النادل باتجاه العاطل )
العاطل – (يعطيه النادل هون نحاس)
خبطت علي باب الرحم....فتحلي واحد لابس ابيض في ابيض ..سحبني من دماغي ..ماعترضتش...مسكني من رجلي ورفعني لفوق..قلت ماشي وسكت...لكن يضربني علي (يمسك مؤخرته)...لأ..والف لأ...اعترضت لكن برضه ضربني...عيطت..ومن يومها..في المدرسه ..في الجامعه حتي بعد ما اتخرجت و بادور علي شغل...من يومها وانا باعيطواحس بأيده وهي بتضربني علي.....وكأنها سابت علامه ابديه مش راضيه تطلع ابدا.........
(ينظر
له الجميع فجأه)
الجميع – اسمع كلام امك
العاطل – (يدق الهون)..سمعت كلام امي ...سمعته كويس ..
الزوجه – (تشخص امه) ذاكر جامد علشان تنجح..احنا لاعندنا ملك ولا احنا صحاب
بيزنس..شهادتك هي سلاحك
(يدق في الهون)
المجموعه – اسمع كلام ابوك
العاطل – حاضر
المثقف – (ابا)...لازم تعرف قيمة الكتاب وتقدره وتصاحبه..الكتاب اقرب صاحب
ليك
العاطل – (يدق في الهون)...حاضر
النسوانجي – لازم تنام بدري علشان تصحي بدري ومالكش دعوه انا باسهر ليه
العاطل – (يدق في الهون)...حاضر
المتطرف – اعمل الصح....علشان ماتدخلش النار ..,ورموشك تقع وجلدك يسيح
ومصارينك تفرقع
وتطلع بره زي السمكه المشويه علي الكانون..
اعمل الصح
العاطل – (يدق الهون)...حاضر...حاضر...حاضر
المجموعه – اسمع الكلام (يكررون)
العاطل – (يدق الهون ويردد) ..حاضر ..حاضر
العجوز – (بيده ملف)...هايل ده سي في ينفع واحد يكون بيدور علي عريس ابن حلال لبنته....لكن في سوق البيزنس...آسف ..ولا حاجه
العاطل – ولا حاجه....؟؟؟؟! طيب جوزني بنتك
العجوز – (يقهقه) انت ابن حلال آه........بس ابن حلال عواطلي
العاطل – لكن.........
العجوز – مافيش لكن ..........اسمع الكلام
(يضربه علي مؤخرته)
العاطل – برضه..؟؟!!!
المطربه – (تغني)...(لاحمد منيب)
الوعد والمكتوب نمشي
سكك ودروب ولا ينتهي المشوار
الوعد والمكتوب نتعب
ولا بندوب والليل في آخره نهار
الوعد والمكتوب تقسي علينا قلوب لانخاف ولا نحتار
النادل – لايكات كتير قوي...الفيس بوك ولع
(يعطي الزوجه كوفيه رجالي او قميص)
الزوجه – الصبر طال...طاااااال قوي ...موسم ورا التاني والانتظار مر علقم
موسم ورا التاني
مابيطرحش غير علقم.....في الشتا المطره دموع علي
الإزاز....في الربيع
ورد دبلان مش لاقي ايد ترعاه...في الصيف صهد
علي صهد...جهنم حمرا...في الخريف ..قلب وحداني..وحدااااااااني
(يتلقفها الممثلون واحدا وراء الآخر في حالة حصار حولها)
النسوانجي – محتاجه طقم حنيه
المثقف – محتاجه درس حريه
العاطل – محتاجه تشغلي وقتك..الفراغ رذيله
المزدوجه – محتاجه تتعلمي السكرته...كل حاجه ممكن تحصل..لكن في السر
العجوز – محتاجه اللي يستاهل..اللي يستحق
الممثل – محتاجه لدور بطوله ..لبوسه من شفايف جان الروايه
لاعب1 – محتاجه المسافه تقرب كام يارده زياده
لاعب 2 – محتاجه شوطه بين التلات خشبات
المتطرف – محتاجه ألم علي وشك....(يصفعها)
(تحتضنها الأم).......(تؤدي المطربه بعض الآهات)
الزوجه – كنت محتاجالك تفضل
النادل – دعاكي النسوانجي للإعجاب بصفحته الجديده ..نساء وحيدات
المزدوجه – لايك طبعا.............لأ ديس لايك أكيد
(النادل يضع امام النسوانجي طبق فاكهه)
النسوانجي – باحب الفروت سلات...المنجه لوحدها لأ...الكمثري..الجوافه
البطيخ........ماباحبش
حاجه لوحدها..اموت في الفروت سلات
كله علي بعضه
وفوقيهم الكريم شانتيه..وباعشق قوي اني اسرق
الفاكهه من الفكهاني...غير
كده الفروت سلات مابيبقالهاش طعم
درس في الدناوه اتعلمته من صغري...من وانا في ابتدائي
(تجسد الأم شخصية مدرسه متزمته)
المدرسه – انا مش قلتلك ماتقعدش جنب البنات...بتلزق فيهم ليه كده.؟؟!
النسوانجي – احنا كلنا صحاب
المدرسه – فز قوم ابعد بلاش مسخره..انت ولد وهم بنات...عارف يعني ايه بنات
النسوانجي – لأ مش عارف
(تجسد الزوجه مدرسه اخري جذابه ومتحرره)
مدرسه 2- ركزوا في الدرس...
(ينزل النسوانجي اسفل مكتب المدرسه)
مدرسه 2 – هاه علم مصر لونه ايه..؟
النسوانجي – احمر وبفيونكه
مدرسه 2 – انت بتعمل ايه يا ولد..؟؟!!
النسوانجي – بادور علي ريال فضه...وقع مني تحت مكتبك
مدرسه 2- (تضحك) بتعمل ايه يا مصيبه..؟!
النسوانجي – بصراحه يا ميس كنت عاوز اعرف يعني ايه بنات
( ينفصل عن
التشخيص)
النسوانجي – عشان كده انا باحب الفروت سلات
النادل – لا احد معجب بذلك
النسوانجي – اومل ايه اللايك ده...فيه حد عامل لايك اهه...مين..؟1
المزدوجه – انا...مش انا طبعا...مش انا
النادل – (يلبس الممثل تاجا فوق رأسه)
( موسيقي مناسبة )
( يتحول الجميع الي شخصيات هملتية ماعدا اللاعبان)
الممثل – (يردد جزأ من مونولوج الكينونة لهاملت) .. أكون أو لا أكون....تلك هي المسأله ...
الشبح : انا شبح ابيك
هملت : ابي
الشبح : كتب عليّ ان اهيم بالليل حتي تأخذ بثأري...
هاملت : وهل مت قتيلا يا ابي..؟
الشبح : الذي قتلني هو الذي يتقلد الآن تاجي
هاملت : عمي..؟!... ( يكمل مونولوج الكينونة ناهيا اياه بجملة : ولتكن مباراة في القتل )
( النادل يطلق صافرة )
لاعب 1 : سيداتي انساتي سادتي ...اهلا بيكم في مباراة الدم والمقامة في ستاد دنماركة بين كل من فريق الملك وفريق الأمير ونتمني لكم مشاهدة ممتعة
لاعب 2 : هجمة منظمة من ورا لقدام ...والكورة مع بولونيوس
بولونيوس : مولاي ...كأب محافظ اخبرك ان احاديث الوداد من هاملت لأوفيليا قد زادت عن حدها في الآونة الأخيرة
لاعب 1 : بيباصي للملك والملك بيرجعهاله تاني ...
الملك : هل انت واثق مما تقول...؟
لاعب 2 : هات وخد جميلة
بولونيوس : كتابع مخلص واثق تمام الثقة
لاعب 1 : بتقطعها جرترود في الهوا
جرترود : هل لديك من القرائن ما يثبت ذلك ...؟
لاعب 2 : بتنزل لبولونيوس تاني علي الارض وبيستقبلها كده بكل ثقة
بولونيوس : نعم...لدي خطاب موجه منه اليها
لاعب 1 : وسرو جميلة في منطقة الخطر
بولونيوس : الخطاب يقول
اوفيليا : (تقرأ ) ارتابي في ان الشمس تدور...ارتابي في ان الكون سراب ..لكن لا ترتابي ابدا في حبي....هاملت العاشق
لاعب 2 : الله الله الله...دي المباراة احلوت والله
جرترود : لابد وان نتأكد اكثر
لاعب 1 : محاولة دفاعية من جرترود...لكن محاولة هشة
بولونيوس : لدي اقراح يقطع الشك باليقين سنظهرها له بينما يمر الآن وانري
ما يحدث
( يدفع بأوفيليا الي طريق هاملت المار يهذي )
اوفيليا : لدي منك هدايا ارغب في ردها اليك
لاعب 2 : واوفيليا بتبدأ الهجمة
هاملت : اوفيليا الجميلة ...احترامي وخالص ودي
لاعب 1 : هاملت بيطلع الكورة بره بمبدأ السلامة
لاعب 2 : اوفيليا بتلعب الآوت
اوفيليا : لكن الهدية تفقد قيمتها متي جهلت اشارة المعطي..وانت لم تشر بعد الي شيئا شريفا
لاعب 1 : تدخل خشن كده من اوفيليا لكن اللعب شغال والحكم بيقول مافيهاش حاجة
هاملت : ( يكشف وجود الباقين ) لكني لا احبك
لاعب 2 : بيرفعها هاملت والرفعة حلوة
هاملت : هل انتي جميلة ..؟
لاعب 1 : وبيرفعها تاني
هاملت : هل انتي عفيفة..؟
لاعب 2 : وبيرفعها كمان
هاملت : حذاري ان يكون لجمالك ادني اتصال بعفافك
اوفيليا : وهل يكون للجمال ما هو انبل من العفاف قرينا..؟
لاعب 1 : اوفيليا بتحاول تزبط دفاعتها شوية
هاملت : بوسع الجمال ان يحول العفة الي قوادة سافلة
لاعب 2 : وجوه الجون....جون جون جون...الله عليك يا هاملت...الله عليك يا حبيب والديك
لاعب 1 : انا شايف الحكم لغي الجون...الحكم بيقول فيه تسلل
هاملت : لا...لا...من مآسي هذه الحياة ان تلتمس الفضيلة غفرانا من احضان الرذيلة
لاعب 2 : اوبا...الحكم بطلع لهاملت الكارت الأحمر...الطرد الاول في المباراة لهاملت
هاملت : لا...لا ايها القدر الحالك
لاعب 1 : هاملت بعترض والحكم مصر...بس هاملت بيقول انه مش هايخرج الا لما يقول مونولوج
هاملت : ( مونولوج مختار )
( بانتهاء المونولوج يصفر النادي)
لاعب 2 : والحكم بينهي المباراة...سيداتي انساتي سادتي سريعا نطير الي ملعب آخر ومباراة اخري
( يقذف النادل بكره الي لاعب 1)
لاعب 1- خط الضهر م اليمين للشمال
لاعب2- الضهر انحني بدري بدري يامعلم ...شد (يعطيه سيجارة المخدر)
لاعب 1- اما عن خط الوسط
لاعب 2 – الوسط اتقطم من زمان ...هات انا اشد (يأخذ السيجاره)
لاعب1- اما عن راس الحربه.....
لاعب 2 – اتكسر ....خد شد.....وبالمناسبه حارس المرمي بقي حارس عقار
لاعب1- طيب هانكتب ايه ع الفيس بوك....؟!
لاعب 2- اكتب ان احنا اكبر بطلين في العالم.......بس في البلاي ستيشن
لاعب 1- تعالي نخش كاس عالم.....الدماغ شعشعت وهاقطعك
(أصوات تعليق رياضي لعصام الشوالي )
(النادل يعطي الأم شالا تضعه علي كتفيها)
الأم – أنا ياولاد باطبخ ملوخيه حلو قوي...والسر في الشهقه في
التقليه...ودقية
الباميه والمحاشي
ماقولكش...ربيت ولادي احسن تربيه...بس كل واحد فيهم
طلع لنصيبه في الدنيا..بس
كلهم قريبين مني..الا الواد الغرباوي ده اللي شد رحاله لبلاد الجاز وسنه ورا
التانيه قسوة الصحرا زحفت علي قلبه...
شكله اتغير لما كنت باشوفه
في الصور ماكنتش باحس انه ابن بطني ابدا
طريقة كلامه
اتغيرت...افكاره ...اكله شربه...ارجع يا وله...ارجع
ارجع بقي يا ابن الكلب
العجوز – اللي بيروح مابيرجعش يا حاجه
النادل – علق العجوز علي حالتك
الأم – بس انا أم ولازم استناه ...مهما كبر وبقي قاسي...ده ضنايا
المطربه – (تغني) <جزأ من اغنية شاديه>
سيد الحبايب يا ضنايا انت ........يا كل عمري ومنايا انت
(النادل يعطي للمتطرف سبحه)
(يأخذها المتطرف ثم ينظر مليا للنادل وللممثلين وللناس )
النادل – دورك
(يهمل السبحه
في اي ركن ثم يخرج مسدسا وبكل غل
يطلق رصاصه في الهواء)
(بلاك مصحوب ببؤرة اضاءه علي النادل)
النادل – زمان...السايبر ده كان فيه ضرب رصاص برضه...بس مش من جوه الناس اللي فيه علي بعضهم كده ..لأ...كان من براهم......آه...اصل السايبر ده زمان كان خندق...الكل كان بييجي يهرب فيه......
(صوت نفير
غاره)
صوت – غاره.......غاره طفوا النور.......غاره
(صاحب السايبر ابن بلد وبيده كلوب نور سيكون رجل 1)
رجل1- (يطمئن علي الجميع) ..تعالوا تعالوا...فين ام جابر...؟!..تعالي...وصدفه وشلبي...؟!...وحامد وسلطان..؟!
النادل – (رجل 2) كله تمام ياريس غريب...الحته كلها نزلت الخندق
غريب – لما نشوف ولاد الكلب دول آخرتها ايه معاهم...؟!
رجل 2 – آخرتها انهم هايتهزموا هزيمة الكلاب بإذن الله ياريس غريب
غريب – عاوزين ينطوا جوه الحدود..بس ده لما يشوفوا حلمة ودنهم ياعربي
لازم يعدوا علي جتتنا الأول راجل راجل ومره مره وعيل عيل قبل مايطولوا شبر واحد م الأرض
عربي – معلوم ياريس
( أصوات ضرب نيران وقذائف تتزايد بشده)
عربي – ايه ده يا ريس...؟؟؟!!
غريب – دول ولادنا بيردوا....(يتهلل) ياللا خلصوا عليهم ...اطردوهم شر طرده
انا شايف النصر جي....شامم ريحته
( النساء تزغرد )
( تتوقف اصوات الضرب)
(لحظة صمت وترقب)
( نسمع صوت الزعيم الراحل جمال عبد الناصر في خطبة التنحي)
الصوت – لقد اتخذت قرارا واريد منكم ان تساعدوني عليه...لقد قررت ان اتنحي
تماما ونهائيا عن اي
منصب رسمي ...واعود الي صفوف الجماهير
لأؤدي واجبي كأي مواطن عادي
المطربه – (تغني) (جزء من اغنية عدي النهار لعبد الحليم حافظ)
عدي النهار
والمغربيه جيه تتخفي ورا ضهر الشجر
وعشان نتوه في السكه
شالت من ليالينا القمر
وبلدنا قعده ع
الترعه بتغسل شعرها
جالها نهار ماقدرش
يدفع مهرها
ابدااا...دي بلدنا
بتحب النهار
بتحب موال النهار
النادل – (حاكيا) طبعا بتحب النهار...وانتوا عارفين باقي الحدوته
(اصوات طلقات وقذائف مره اخري وسط ترقب وانفراج الجميع)
(تعاود المطربه الغناء وسط فرحه عارمه من الجميع وجو احتفالي راقص)
المطربه – حلوه بلادي السمره بلادي الحره بلادي السمره بلادي
وانا علي الربابه
باغني ما املكش غير اني اغني واقول
تعيشي يامصر
وانا علي الربابه
باغني ما املكش غير غنوة أمل للجنود
أمل بالنصر............(الخ)
النادل – وعدينا ياروقه....عدينا....الكابوس انزاح ..السحابة السودة انكشحت وهل النور...الله اكبر.....(يغير ملاكحه فجأة) ... لكن فجأه الخندق ده اتحول لسوبر ماركت كبير ...سوبر ماركت وكله عارض فيه بضاعته
( تغيير اضاءه)
(جميعهم يسوقون لبضاعتهم كالباعه الجائلين)
العاطل – (بائع ملابس) كل المقاسات والألوان ب اتنين ونص ...قرب يامحترم
الأم – بلوبيف سويسري...تونه ياباني...فراخ برازيلي
الزوجه – (غانيه) .....تسمح تولعلي
المزدوجه – المساواه...المساواه...(تغير)....ضل راجل ولا ضل حيطه
المتطرف – الحرام الحرام...الحلال...الحرام الحرام...الحلال
المثقف – ميكيافيلي...ماركس لينين باكونين...وعليهم جيفارا هديه
المتطرف – (بلغة منافسه) تلاته حرام وعليهم واحد حلال هديه
الممثل – المشاغبين في الجيش...المشاغبين في بيت الطلبه...دمي ودموعي وبنتعمي
النسوانجي – شاب مفتول العضلات لأي ست تشعر بالوحده...جاهز ومجاني
العجوز – فرصه ذهبيه للعمل في بلاد الجاز
( اللاعبين 1-2 وقد
ارتدي كلا منهما قميصي الأهلي والزمالك
وارتديا باروكتين كانيش)
لاعب1- مع بيبو......الخطيب
لاعب2- والمعلم ..حسن شحاته
اللاعبين – (معا) استمتع مع...الكابتن لطيف....الله يرحمه
( الجميع يكررون جملهم مروجين بضاعتهم بشكل كريشندو متصاعد)
المطربه – (تغني) ...(من اغنية عدويه الشهيره)
زحمه يادنيا زحمه
زحمه وتاهوا الحبايب...زحمه ولاعدش رحمه
مولد وصاحبه غايب...........(الخ)
(بينما يرقص الجميع
ويلعبون بالكره)
(بانتهاء الأغنيه يطلق مدير السايبر صافره من صفاره معدنيه فيسكت الجميع
ويعودون الي اماكنهم)
المدير – (آمرا النادل)...تويتر
النادل – نعم...؟!!
المدير- باقولك تويتر
النادل – هنا كده علني..؟!!
المدير- تويتر يا بني آدم
النادل – هانبل الناس ياريس وهاتبقي لحوسه مش لطيفه
المدير – نفذ ...باقولك تويتر........تويتر
النادل – خلاص ....تويتروا ياجماعه...تويتروا كلكم
( يلاحظ ان جميعهم اصبحوا حازمين مصرين علي شئ ما)
العجوز – قررت بعد تفكير طويل أن يرث تركتي كامله واحدا فقط من أبنائي علي أن يرث هذا البيت بمحلاته وبشققه وبكل سكانه........
النادل – تويت
الأم – نويت والنيه لله ......اتبري من ابن الكلب العاصي
النادل – تويت
العاطل – استقريت مادام مش لاقي شغلانه.....اني اشتغل اي حد
النادل – تويت
المثقف – قررت الزق صور جيفارا علي كل تيشيرتاتي...وعلي كل الميكروباصات
والتكاتك اللي هاصادفها
النادل – تويت
المزدوجه – نويت أعط بجد.......أو ما اعطش مش عارفه لسه
النادل – تويت
النسوانجي – اعلنت توبتي........قررت ابعد عن البنات...كل البنات...نشاطي
هايبقي
نسوان بس
النادل – تويت
لاعب 1 – نويت احط الكوره دي جون......ولو آخر كوره هاشوطها في حياتي
النادل – تويت
لاعب 2 – نويت اصد الكوره دي......ولو آخر كوره هاصدها في حياتي
النادل – تويت
الزوجه – قررت ماستناش اكتر من كده...انا ست..وعلي رأي الست انما للصبر حدود
النادل – تويت
المتطرف – حاسس بأيام مباركه راجعه تاني...يبدو ان وقت العوده قد اقترب
النادل – تويت
الممثل – القضاء يدعوني...وقد جعل اصغر شريان من شراييني اصلب من عصب
الأسد الضرغام.........(يصرخ)......أنا هاملت
المطربه – (تغني) (من اغنية منير)
وانا...انا ويا شمس
المغيب بغيب وانتي بتشرقي
بتكدب الحقايق في العالم لغريب وانتي بتصدقي......(الخ)
النادل – (حاكيا)...زمان ..السايبر ده قبل مايبقي سايبر..وقبل مايبقي سوبر
ماركت
أو خندق...وحتي قبل ما
يبقي قهوه ...كان معبد..آه معبد اخترعوا فيه قواعد
لعبة الحياه والموت....
(تتغير الأضاءه
والممثلون يرتدون موتيفات فرعونيه يتحركون بنمطهم)
( موسيقي فرعونيه طقسيه)
النادل – وعاش الناس سعدا.........اللي عايش واللي ميت..لحد ماجه يوم واتغيرت معادلة اللعبه
)فتاة تقدم قربانا وتدعو وفتي يقدم قربانا ويدعو)
الفتاة : أدعوك آمون ان تبارك امي من كل شر
الشاب : ادعوك رع ان تنقذ ابي من آلامه
الفتاة : ان استجابتك آمون العظيم تمنحني الحياة من جديد...اشفي مرضها
الشاب : انقاذك له يا رب الارباب رع يعني منحي الايمان الأبدي
الفتاة : (تضع القربان) بوركت آمون
الشاب : (يضع قربانه ) بوركت رع
( تتتلتقي عيناهما)
الشاب : انتي
الفتاة : انت
الشاب : كروح معذبة أهيم بحثاعن لقياك
الفتاة : في قاع الجحيم اسكن حيث لا تكون
الشاب : (يعطيها بردية ) في هذه البردية كتبت عنك ومنك اليك
(نقسم الممثلون الي مجموعتين يتزعم كل مجموعه منهما كاهنا يتحديان بعضهما)
( كاهن يجذب الفتي وكاهن يجذب الفتاة)
كاهن 1- باسم آمون كبير الآلهه
كاهن 2 – باسم رع كبير الآلهه
كاهن 1 – آمون راعي الحياه
كاهن 2- رع مسلط الموت
كاهن1- آمون باعث النور بيمناه
كاهن 2- رع مشعل النار بيسراه
النادل – وواحده واحده بدأ الخلاف يكبر
كاهن1- باسمك آمون حامي النيل شرياننا الدافق
كاهن2- باسمك رع حامي الهرم العظيم رمز شموخنا وعزتنا
كاهن1 – لتعلو كلمة آمون في كل ربوع البلاد
كاهن 2- ليتقدس اسم رع علي السنة الشعب فردا فردا
كاهن 1- يجب الا يوجد بيت في البلاد لاتعلو فيه كلمة آمون
كاهن2 – الا يوجد جنين في بطن أمه الا وتلقن مبادئ رع
كاهن1 – من ليس مع آمون فهو ضدنا
كاهن 2- من كفر برع فهو عدونا
كاهن1 – آمون
كاهن 2- رع
(يكرران وقد بلغ بهما الغل والغضب مبلغه وكذلك باتباع كلا منهما)
النادل – وهنا تدخل الرجل الحكيم حقنا للدماء
(المدير مجسدا الحكيم)
الحكيم – فليصمت الكهنه قليلا يا ساده ....اذا تحدث الكهنه كثيرا فإن انهار
الدماء
تكون علي وشك أن
تفيض......الحل عندي ايها الأهل الطيبون...صفات
صفات آمون عند
اتباعه...هي نفس صفات رع عند اتباعه..استتقاتلون
من أجل
مسمي..؟!!...ليكن الإله اذن آمون رع...ولتنعم البلاد بالسكينة
والسلام..........آمون رع
(لحظة صمت يفكرون فيها
ويرددون آمون رع ..!!)
(ثم تتهلل اساريرهم)
كاهن 1 – (يمد يده لكاهن 2) ...آمون رع
كاهن 2 – (يصافحه) آمون رع
( الشاب يحتضن الفتاة في سعادة)
(النساء الفراعنه يزغردن والرجال يتهللون)
(نسمع اغنيه شعبيه مما بات يعرف بأغاني المهرجانات ..يرقص علي طبولها الفراعنه)
النادل- حل بسيط بتعريفه...بس المشكله –وقتها طبعا- خلصت للأبد...كان حكيم
قوي الراجل ده
المدير – جوجل سيرش
النادل - أهه رجع لسحنته اللي مش مفهومه...ما انت كنت زي الفل وانت فرعوني
المدير – جوجل سيرش
النادل – (مستسلما)..........دوروا...جوجل...كله سيرش سيرش ياللا
العجوز – الصيغه النهائيه للوصيه
(يثقب شاشة الكميوتر
السوليفانيه ويخرج منها صكا ملفوفا كالبرديه
وخنجرا صغيرا يتخذ به موقف المدافع عن الصك)
العاطل – الحل البديل للحصول علي عمل
(يثقب شاشته ويخرج
منها لاي ومبسم شيشه...يضحك ويتظاهر بالتدخين
منه ..ثم يغضب ويمسكه بشكل يشبه الكرباج)
المزدوجه – انا بادور علي نفسي ...عاوزه الاقيني
(تخرج من شاشتها
مرآه ذات يد طويله تراقب نفسها وهله ثم تلتفت
للآخرين وتمسك قبضة المرآه في توجس ودفاع)
المتطرف – الوسيله المثاليه علشان اطبق الشئ الوحيد الصحيح
( يثقب شاشته ويخرج
منها برنيطه خواجاتي ومسدس فيعتمر القبعه
ويلوح بالمسدس في وجه الآخرين)
المثقف – كيفية القضاء علي الأميه والجهل ورفض الآخر
(يثقب شاشته فيخرج
قلما ضخما كبيرا مدبب السن وكأنه سلاح كبير
بالفعل يمسكه وكأنه بندقيه تجاه الآخرين في نفس التوجس)
الممثل – عاوز اكون........عاوز اكون
(يثقب شاشته ويخرج منها سيف
شيش وقبعه من العصر الإليزابيثي يعتمر
القبعه ويشهر سيفه)
الممثل – (يصيح) هل من مبارز....؟؟!!
(يزداد التوتر اكثر وكل يتوجس من الآخر ويؤكد علي سلاحه)
النسوانجي – اكس إن اكس اكس.......اشهر موقع اباحي
(يثقب شاشته فيخرج
مجموعة مجلات كما لو كانت مجلات بورنو
يطالعها في شغف ثم
ينظر للجميع حوله فيلفها لتصبح كما لو كانت
عصا قصيره وضعيفه ...لكنها سلاحه الوحيد)
الزوجه – حل الصبر....وعمي العيون النهاشه
(تخرج من شاشتها
مكنسه فتضحك ساخره مستهزئه ولكنها تستخدمها
في التلويح بها كسلاح)
لاعبان 1-2 – ده يوم ما ابطل اشجع...هاكون ميت اكيد
( يخرجان من الجهاز نصفي كره وعلمين احدهما
ابيض والآخر
احمر فيرتدي
كلا منهما نصف الكره فوق رأسه وهما يضحكان
ويأخذ كلا
منهما علما وما ان يفرد كلا منهما علمه ويراه حتي
ينظران لبعض
بشئ من العداء ويشهر كلا منهما علمه في وجه
الآخر كسلاح)
الأم – ( وقد لمحت كل هذا التوتر حولها وتيقنت من صدام قادم)
وصفه للستر.....مش عاوزه غير وصفه للستر
(تخرج من شاشتها حله ورف
خشبي ..تنتحي بهما لتلبس الحله فوق رأسها
وتضع الرف وتجلس فوقه)
الأم - انا هاقعد ع الرف وادعي ان
ربنا يستر عليكم...ما املكش غير الدعا
( تصرخ) استر يارب
( مع صرختها تتصاعد
وتيرة الترقب وحدة التوتر واستعداد كل شخص
للآخر وتحفزه ضده وتمسكه بسلاحه)
( يبدأون في الدوران حول الأم في حلقه
وكل منهما شاهرا سلاحه في وجه
الباقين ومستعدا لقتاله
في اي لحظه)
النادل – بصوا لبعض........كلهم بصوا لبعض....مافيش ولا واحد منهم عاجب
التاني
...وكل واحد عاوز حاجه غير التاني...وكل واحد سلاحه في وش التاني
المطربه – (تغني) خلي السلاح صاحي
صاحي صاحي
لو نامت الدنيا سهران مع سلاحي............الخ
( جميعهم مع الغنوه قد اوشكوا علي الفتك ببعضهم)
المدير – تايم أوفر......كشف كل
الرسايل وفضح الإنبوكس
النادل – بس...
المدير – مافيش بس...ده أمر...اكشف كل الإنبوكس
النادل - ( للمثقف) اكشف
العجوز – قد تكون افضل ابنائي فهل تستطيع حمل الوصية..؟
الزوجة – ما تنفعش..كلامك ما يحلش مشكلتي
الممثل – صدقني هي غرقانه غرقانه زي ما انت قلت يا صاحبي
المتطرف - اوعي تفتكر انك علشان
اخويا هاسمي عليك..هادبحك وتموت كافر
الأم – يا ولاد الكلب
المدير – كمل
النادل – (للمتطرف) اكشف
العجوز – قد تكون افضل ابنائي فهل تستطيع حمل الوصية..؟
العاطل – بس ده مش شغل...عاوزني اموت الناس..؟!..بس هو المبلغ مغري..اديني
فرصة افكر
الزوجة – انت كده بتطلب حرام فوق الحرام ..كفاية اني بقيت خاينة..مش انتوا
بتقولوا الموضوع ده يتهزله سبع سموات..؟
الأم – يا ولاد الكلب
المدير – كمل
النادل – (في المطلق) اكشف
المزدوجة – (للعاطل) انت خطيبي وحبيبي..بس لازم تلاقي شغل
النسوانجي – (للمزدوجة) اتبسطتي معايا المره اللي فاتت..؟
العاطل – (للعجوز) انا ليه مش افضل ابنائك..؟
المزدوجة – (للمتطرف) قريت كل الكتب اللي انت اديتهالي...عجبني كتاب عذاب
القبر
المتطرف – فتح الله عليكي..مهم تسمعي كلام اخوكي الكبير
المزدوجة – (تضحك بخلاعة)
الأم – يا ولاد الكلب
لاعب 1 – (للزوجة) الصراحة انتي ملفاية مالكيش حل
الزوجة – بس يا واد انت صغير..واحنا جيران يا واد
لاعب 2 – انا صغير..؟!..طيب عمري علي عمره نبقي اتنين في واحد
الزوجة – (تضحك بخلاعة)
الأم – يا ولاد الكلب
العجوز – ان افضل ابنائي في الغربة وحده
النسوانجي – (للعاطل) صدقني يا صاحبي كل عيش
العاطل – بالطريقه دي يا صاحبي..؟..يعني اقتلك مثلا..؟
الممثل – لو فيها فلوس انا ممكن اعمل عرض دينيه علي فكره يا صاحبي
العاطل – ماحدش يقولي صاحبي بعد اللي شفته دلوقتي يا اوساخ..
المدير – اكشف
الزوجة - (للشابين) جيالكم بكره
بعد صلاة الجمعة
المزدوجة - (للعاطل) انت حبيبي
الوحيد (للنسوانجي) انت المزاج كله
العاطل – (للمتطرف) انا قررت اشتغل معاكم
الممثل – التمثيل اصلا حرام..انا كمان معاكم
المثقف – ينعل ابو كل الكتب اللي في الدنيا
المطربة – صوتي ضاع...صوتي ضاع
الأم – يا ولاد الكلب
(يشتد الصراع بينهم جميعا بشدة ويعود كل منهم لسلاحه المعتاد)
العجوز – ان افضل ابنائي في الغربة غريب
الأم – يا ولاد الكلب
(المدير يضحك مع تصاعد الأحداث)
المدير - فتح الرسايل لازم يعمل كده...( للجمهور) انا لو امرت بفتح رسايلكم...هاتموتوا بعض...ماحدش فيكم هايرحم التاني....بلاك
(يفصل القابص الكبير الذي خلفه فيظلم المشهد بينما تبقي بؤرة اضاءه علي النادل)
النادل – ما باليد حيله....لما بيقول بلاك...بتبقي بلاك...(يرفع موبايله عاليا) سيلفي بقي ما قبل البلاك عشان الصورة تنزل ع الانستجرام.....بلاك
.........................................................................................بلاك
سامح عثمان
25 اغسطس 2012
للإطلاع علي بوستر العرض وصناعه وأبطاله إضغط هنا 👇
لمشاهدة العرض المنتج بمسرح الشباب عبر هذا الرابط 👇
التعليقات على الموضوع