حلمك الشتوي - سامح عثمان
وحلمك الشتوي في دولاب عمرك
بقاله قد إيه متشال..؟
بين كل صيف والتاني تنسي تطلعه
وإن افتكرته ...يا دوب تبص عليه..
وتاني ترجعه ..في الحال..
فسؤال..!!
هل انت خلاص غيرت تفصيلتك..؟
عجبي يا متمسك بتفاصيلك..!!
ولا خلاص مابقاش كمان حيلتك..
مطرة بصوت فيروز تنزل وتشتيلك..؟!
وللا الوجع في القلب والكعبلة في راسك
لخبطوا كل الفصول وفصلوا إحساسك..؟!
( تعدي مواسم وفصول..كل الورود بتزول )...
آدي حلمك الشتوي...مسك إيديك باسك
ومش مهم اننا في عز حر الصيف
المهم بس أنه يكون لساه علي مقاسك
..........................................
سامح عثمان ( 12 يوليو 2020 )
التعليقات على الموضوع