حد عارف مين أنا..؟
.......................
أنا اللي بيحركني خيط الحلم
فين ما يعوز..
مش السنيد لبطل الفيلم
ولا أراجوز.....
أنا فارس...
لكن فارس نسي سيفه
بيتداري ويتسحب بطراطيفه
ويمشي من ورا الأيام
ويسرق ساعة علي كيفه
................................
أنا الواد اللي ما يقشش
ده من يومي
رموني الأرض كات فاضيه
يادوبك قشها الكومي...
أنا الياك اللي عاش محبوس حدود خانه
أنا والزهر. مافيش ولا حاجه جمعانا
وإيد الدنيا بتحسس علي القواشيط
وانا ترزعني وتاخدني علي خوانه
............................................
أنا المحطوط بين الشطرنج
ما فرقشِ
يادوب حركة أو التانية
ما كملشِ
وطول اللعبة جوه مربعي في الكرب
ملك ووزير وفيل وحصان وقتل وضرب
وانا واقف في مكاني ومستني...
وعارف ان انا اللي هاموت في آخر الحرب
............................................
(سامح عثمان)
رابط فيديو القصيدة من هنا 👇👇
الله عليك
ردحذف